வன்னியில் இருந்து காயமுற்று திருமலை வைத்தியசாலைக்கு வந்த இரண்டாம் தொகுதி மக்கள் விபரம்!

ஸ்ரீலங்கா படையினரும், தமிழீழ விடுதலைப் புலிகளும் வன்னியில் நடத்தும் யுத்தத்தில் காயமுற்று திருமலை வைத்தியசாலைக்கு கடந்த 21.02.2009 ஆம் திகதி அனுமதிக்கப்பட்ட இரண்டாம் தொகுதி மக்களின் பெயர் விபரங்கள்:

தமிழ் இணையத் தளங்களும் பொறுப்பற்ற செய்திகளும்!

நேற்று இரவு 10 மணியளவில் தமிழீழ விடுதலைப் புலிகளின் வான்புலிகளின் இரு விமானங்கள் கொழும்பு கொம்பனித்தெருவில் அமைந்துள்ள விமானப்படைத் தலைமையகம் மற்றும் கட்டுநாயக்க சர்வதேச வானூர்தி நிலையத்திற்கு அருகில் உள்ள ஸ்ரீலங்கா வான் படைத்தளம் போன்றனவற்றை இலக்காக வைத்து தாக்குதல் நடத்த முனைந்தன, ஆனால் இதன் விளைவு எப்படியானது என்பதனை ஊடகங்கள் பக்கச் சார்பாக தங்கள் நிலைக்கேற்ப செய்திகளைத் தந்துள்ளன.

அதிர்வு இணையத்தளம் தாக்குதல் நடத்திய விடுதலைப் புலிகளின் இரு விமானங்களும் தளம் திரும்பி விட்டதாக செய்தி தந்துள்ளது, ஆனால் விமானங்கள் இரண்டும் ஸ்ரீலங்கா விமானப் படையினரின் தானியங்கி விமான எதிர்ப்பு பீரங்கிப் பொறிமுறையால் சுட்டு வீழ்த்தப்பட்டு விட்டதாக ரூபவாஹினி அரச தொலைக்காட்சியில் படங்களுடன் செய்தி காண்பிக்கப்படுகின்றது.

கொம்பனித்தெருவில் அமைந்துள்ள விமானப்படைத் தலைமையகத்தினுள் தாக்குதல் நடத்த வந்த வானூர்தி இலக்குத் தவறி அருகில் உள்ள உள்நாட்டு இறைவரித் திணைக்கள கட்டடத்தின் மீது குண்டு வீசிய போது அவ்விடத்திலேயே சுட்டு வீழ்த்தப்பட்டதாகவும், மற்றய வானூர்தி கட்டுநாயக்கா விமான நிலையத்தை அண்மித்த பகுதியில் சுடப்பட்டு வீழ்ந்து நொறுங்கியுள்ளது, இந்த விமானத்தின் பாகங்களுடன் விமானத்தை ஓட்டிவந்த வான்புலிகளின் வானோடி விமான இருக்கையுடன் இறந்த நிலையில் காணப்பட்டதுடன் விமானத்தின் உட்பகுதியில் வெடிமருந்துகள் மற்றும் குண்டுகள் மற்றும் இரு சயனைற் குப்பிகளும் கண்டெடுக்கப்பட்டுள்ளதாக அரச செய்திகள் கூறுகின்றன.

தமிழீழ விடுதலைப் புலிகளின் வான்புலிகள் நடத்திய தாக்குதலில் இருவர் கொல்லப்பட்டதுடன் 47 பேர் காயமடைந்திருப்பதாக கொழும்பு தேசிய வைத்தியசாலைச் செய்திகள் கூறுகின்றன.

இத் தாக்குதல்களை நடாத்திய வான்புலிகளின் கரும்புலிகளான கேணல் ரூபன், லெப்டினன் கேணல் சிரித்திரன் ஆகியோர்களைக் கௌரவித்து விடுதலைப் புலிகளின் தலைவர் திரு. வே.பிரபாகரன் "நீலப்புலிகள்" எனும் விருதினை இவ்விரு மாவீரர்களுக்கும் வழங்கியுள்ளார் என விடுதலைப் புலிகளின் செய்திகள் தெரிவிக்கின்றன.

வவுனியா வைத்தியசாலையில் அனுமதிக்கப்பட்டுள்ள வன்னி மக்கள் விபரம் !

வன்னியைக் கைப்பற்றும் நோக்கில் ஸ்ரீலங்கா படையினர் நடத்தும் யுத்தத்தில் காயமுற்று வவுனியா வைத்தியசாலைக்குக் கொண்டு வரப்பட்ட பொது மக்களின் விபரங்கள்:

மூளைச் சலவைக்குப் பலியான முத்துக்குமரன் !

ஸ்ரீலங்கா அரச படையினர் தமிழர்கள் மீது நடத்தும் இனவெறி அடக்குமுறைக்கு எதிராக தென்னிந்திய மக்கள் கொண்டுள்ள ஆர்வம் அளப்பரியது, ஸ்ரீலங்கா இராணுவத்தினரின் முல்லைத்தீவு நோக்கிய நகர்வை எப்படியாவது தடுத்து நிறுத்த வேண்டுமென ஸ்ரீலங்கா பாராளுமனறின் தமிழ் தேசியக் கூட்டமைப்பு ஈறாக தமிழக மக்களும் அரும்பாடுபட்டு வருகின்றனர்.

தமிழக மக்களின் இவ் எழுச்சியை தமிழக அரசியல்வாதிகள் தமக்குச் சாதகமாகப் பயன்படுத்த நினைப்பது மனதை நெருடுகின்றது, இவ் அரசியல்வாதிகளின் பேச்சுத்திறனில் மயங்கிய இளைஞர்கள் உண்ணாவிரதம், தீக்குளிப்பு என்றெல்லாம் தங்களை மாய்த்துக் கொள்ள மூளைச் சலவை செய்யப்படுகின்றார்கள்.

இளைஞர்களே உங்களது உயிர் விலை மதிக்க முடியாதவை, உயிரோடு விளையாடாதீர்கள், உங்களை இந் நிலைக்கு திருப்பி விட்டுள்ள அரசியல்வாதிகள் தாங்கள் உண்ணாவிரதம் இருப்பதாக அறிவிப்பார்கள், ஊடகத்துறைக்குச் செய்தி எட்டியதும் விலகி விடுவார்கள், அவர்களுக்கெல்லாம் தேவை அரசியல் கலந்த விளம்பரம் மாத்திரமே, அரசியல் சிம்மாசனத்துக்காக எத்தனை உயிர்களை மாய்க்கவும் தயங்க மாட்டார்கள், இளைஞர்களுக்கு மூளைச் சலவை செய்து கொண்டே இருப்பார்கள், ஆகவே இளைஞர்களே சிந்தியுங்கள்.

முத்துக்குமாரின் சாவு எல்லோரையும் கவலை கொள்ளத்தான் செய்ததே தவிர, ஸ்ரீலங்கா படை நகர்வில் எவ்வித தடைகளையும் ஏற்படுத்த வில்லை, ஸ்ரீலங்கா அரசாங்கம் ஏலவே திட்டமிட்டபடி 48 மணி நேர அவகாசத்தில் தமிழீழ விடுதலைப் புலிகளின் பிடியில் சிக்கியுள்ள அப்பாவி மக்களை வெளியேறி அரச கட்டுப்பாட்டுப் பகுதிக்கு வருமாறு அறிவித்துள்ளது என்பது தான் உண்மை.

இன்னும் பல முத்துக்குமார்கள் உருவாகுவார்கள், இவர்களின் உருவாக்கம் தவிர்க்க முடியாதவை, விடுதலைப் புலிகளின் வீரச் சாவுக்கு ஒப்பானது இம் மரணங்கள் என்றெல்லாம் அரசியல்வாதிகள் தங்களின் வாய்ப் பேச்சுத் திறனின் மூலம் மூளைச் சலவையை விருத்தி செய்து கொண்டே வருகின்றார்கள், ஆனால் அவ் சாவுக்கு அவர்கள் தயாராக மாட்டார்கள், இளைஞர்களை பலியிட முயல்வார்கள்.

முத்துக்குமாருக்கு ஏற்பட்ட மனக் கிலேசம் நியாயமானது தான், ஆனால் அவரின் இந்த திடீர் முடிவு பரிசீலிக்கப்பட வேண்டியது, அவர் வாழ வேண்டியவர், இன்னும் பல போராட்டங்களை பார்க்க வேண்டியவர், அரசியல்வாதிகளின் நாடகங்களை பதிவு செய்ய வேண்டியவர், துரதிஷ்டம் திடீர் முடிவு எடுத்து சாவைத் தழுவிக் கொண்டது தான்!

‘பெண்ணே நீ’ மாத இதழில் ஊடகவியலாளராகப் பணிபுரிந்த, சென்னை.99 - கொளத்தூர் மக்கான் தோட்டம், திருவள்ளுவர் தெருவைச் சேர்ந்த கு.முத்துக்குமார் திட்டமிட்டு பலியாக்கப்பட்டது கவலை கொள்ள வைக்கின்றது, 26 அகவையையுடைய இவ் வாலிபன் நான்கு பக்க அறிக்கை எழுதும் அளவுக்கு பட்டறிவு உள்ளவனல்ல, ஈழத் தமிழினம் காக்க இந்தியாவில் தீக்குளிப்பது என்பது காலில் உள்ள காயத்துக்கு தலையில் மருந்து கட்டுவது போன்றாகும்.

முத்துக்குமார் இறுதியாக தயாரித்த மரண வாக்குமூலம்

முத்துக்குமாருக்குக் களத்துமேட்டின் கண்ணீர் அஞ்சலி

விடுதலைப் புலிகளின் தவறும் தமிழ் அரங்கமும் !

விடுதலைப்புலிகள் தவறை உணர்ந்து திருந்தி விட்டார்கள் எனும் தலைப்பில் "தமிழ் அரங்கம்" தனது பாணியில் பத்தியொன்றைப் பதிவு செய்திருந்தது, குமுதம் சஞ்சிகைக்கு தமிழீழ விடுதலைப் புலிகளின் அரசியற்துறைப் பொறுப்பாளர் திரு.பா.நடேசன் அவர்கள், முஸ்லிம்கள் உட்பட தமிழ் பேசும் மக்கள் தமிழீழ விடுதலைப் புலிகளின் பின்னால் அணி திரள்க எனும் பதத்தினூடாக வழங்கிய செவ்வியின் ஆதங்கமே தமிழ் அரங்கத்தின் இச் சாடலாகும்.

யாழ்ப்பாணத்தில் காலம் காலமாக வசித்து வந்த முஸ்லிம்கள் ஒரே இரவில் உடுத்த உடையுடன் தமிழீழ விடுதலைப் புலிகளால் துரத்தப்பட்ட சம்பவம் உலகம் அறிந்ததே! இதனை முழுப் பூசனிக்காயை சோற்றுக்குள் மறைக்குமாப் போல் தெரியாது எனக் காட்ட திரு.பா.நடேசன் முனைவதே வேடிக்கையாக இருக்கின்றது.

"முஸ்லிம்கள் எமது சகோதரர்கள். எம்முடன் இரத்தமும் சதையுமாக வாழ்பவர்கள். எமது விடுதலைப் போராட்டத்துக்குக் களங்கம் ஏற்படுத்த நினைத்த சில தீயசக்திகள்தான் எமது இயக்கத்தின் பெயரைப் பயன்படுத்தி அம்மக்களை வெளியேற்றினர். எங்கள் தலைவர் அப்போது பாதுகாப்பு காரணங்களுக்காக தூர இடமொன்றில் இருந்தார். இந்தச் சம்பவம் பற்றிக் கேள்விப்பட்டதும் இந்தக் குற்றத்தைப் புரிந்தவர்கள் மீது பாரிய நடவடிக்கை எடுக்கக் கட்டளையிட்டார். இன்றும் அந்த மக்களை மீளவும் அவர்களது வாழ்விடத்தில் குடியேறுமாறு நாம் கூறிவருகிறோம். ஆனால் யாழ்ப்பாணம் மீண்டும் எங்கள் கட்டுப்பாட்டில் வந்தபிறகே அவர்கள் அங்கு வந்து எம் அரவணைப்பில் வாழ விரும்புவதாகக் கூறுகிறார்கள்." இவ்வாறு திரு.நடேசன் கூறுவதன் அர்த்தம் தான் என்ன? இதைத் தான் காலம் கடந்த ஞானம் என்பதா, அல்லது சந்தற்பவாத அரசியலா?

யாழ்ப்பாணத்தில் இடம்பெற்ற முஸ்லிம் சுத்திகரிப்புக்கு காரணமாக இருந்தவர்கள் தமிழீழ விடுதலைப் புலிகள் அமைப்பில் இன்றும் பொறுப்பு வாய்ந்தவர்களாக இருக்கின்றார்கள் என்பதனை நடேசன் மறந்து விட்டார் போல்த் தெரிகின்றது, காவற்துறையின் பொறுப்பாளராக இருந்த போது கண்டும் காணாதவர் போன்று நடேசன் இருந்தமையே இந்த பொறுப்பற்ற செவ்வியாகும்.

1990 ஆம் ஆண்டு கால நடுப்பகுதியில் ஸ்ரீலங்கா இராணுவத்துடன் இணைந்து முஸ்லிம்களும் அவர்களின் தீவிரவாத அமைப்புக்களும் அம்பாறை மாவட்ட தமிழ் மக்கள் மீதான இனச் சுத்திகரிப்பை மிகத் திட்டமிட்டு கச்சிதமாக நடாத்தி முடித்தனர், இன்றும் பல தமிழ்க் கிராமங்கள் மனித வாடையற்று காடாகிக் காட்சி தருவது உலகுக்குத் தெரியாத விடயமாகும்.

இக் காலத்தில் அம்பாறை ஊடான இனச் சுத்திகரிப்பு ஆரம்பமானது, இம் மாவட்ட தமிழர்கள் கிராமம் கிராமமாக கொன்றொழிக்கப்பட்டும், சொத்தழிவும் செய்து துரத்தப்பட்டார்கள், இறந்த உறவுகளைப் புதைக்க நேரமின்றி உடுத்த உடையுடன் அகதிகளாக ஓடிக் கொண்டே இருந்தார்கள், தமிழீழ விடுதலைப் புலிகளின் தலைவர் திரு.வே.பிரபாகரனின் மெய்ப் பாதுகாவல் படையணிகளில் இருந்தவர்களின் அதிகமானோர் கிழக்கு மாகாணத்தைச் சேர்ந்தோர்களாக இருந்ததால், தங்களை கிழக்குக்கு அனுப்புமாறும் அங்கு முஸ்லிம்கள் நடாத்தும் இனச்சுத்திகரிப்பை தடுத்து நிறுத்த அனுமதி தருமாறுமாம் கோரி நின்றனர், இதனால் வன்னிப் படையணிகளில் தொய்வு ஏற்படலாயிற்று, இதனைச் சீர்படுத்த விடுதலைப் புலிகளின் தலைவர் எடுத்த திடீர் முடிவானது சற்று ஆச்சரியம் ஊட்டுவதாகவே இருந்தது, அது தான் காத்தான்குடி, சம்மாந்துறை பள்ளிவாசல் தொழுகைகளில் இருந்த முஸ்லிம்கள் மீதான தாக்குதல்களாகும், இதனைத் தலைமை தாங்கும் பொறுப்பு திரு.கருணா அம்மானுக்கு வழங்கப்பட்டிருந்தது, ஆனாலும் முஸ்லிம்கள் தமிழர்கள் மீது நடாத்தும் இனச் சுத்திகரிப்பு தொடர்ந்து கொண்டு தான் இருந்தது, கிழக்கு விடுதலைப் புலிகளால் இவ் வெறியாட்டத்தைக் கட்டுப்படுத்த முடியவில்லை, வன்னிப் படையணிகளில் ஆட்டம் காண ஆரம்பித்தன, இதனைச் சுமுகமாகத் தீர்க்க தமிழீழ விடுதலைப் புலிகள் எடுத்த அடுத்த கட்ட அதிரடி முடிவே யாழ்ப்பாண முஸ்லிம்களை ஒரே இரவில் துரத்த எடுத்த நடவடிக்கையாகும்.

இந் நடவடிக்கை திரு.இளம்பருதி, திரு.கரிகாலன் போன்றோர் தலைமையில் நடத்தப்பட்டதாக ஊடகச் செய்திகள் கூறின, துரத்தப்பட்ட முஸ்லிம்கள் புத்தளத்தில் உள்ள பாலாவி, தில்லையடி போன்ற பகுதிகளிலும் மற்றும் அனுராதபுரத்திலும் இன்று வரை வாழ்க்கை நடாத்தி வருகின்றார்கள்.

தமிழ் அரங்கத்தின் பத்தி தொடர்பாக 19.11.91 அன்று தான் யாழில் நடேசன் பொலீஸ் பொறுப்பாளராக பொறுப் பேற்றிருந்தார். இவர் தனது முதல் நடவடிக்கையாக - இந்த தீயசக்திககளை - ஏன் கைது செய்யவில்லை. அந்தப் பொலீஸ் படையின் முதல் அணிவகுப்பே இதே திகதியில் பிரபாகரன் முன்னிலையில் நடந்ததாக `விடுதலைப் புலிகள்` ஏடு தை - 92 எழுதியதே! அதுவும் பொய்யா? எனக் குறிப்பிட்டு பின்னூட்டமிட்டுள்ளதனையும் நடேசன் கருத்தில் கொள்வது நல்லதல்லவா?

உலகம் இருண்டு விட்டது என நினைத்து அர்த்தமற்றுப் பதிலளிப்பது காத்திரமாக இராது, அனைவரும் விழித்துக் கொண்டிருக்கின்றார்கள் என்பதனை பொறுப்பு வாய்ந்தவர்கள் கண்டு கொள்ள வேண்டும்.

தமிழர் புத்தாண்டும் உப்பு மடச்சந்தியும்!

எமது வலைப் பதிவுலகிலுள்ள தோழர் ஹேமா தனது "உப்பு மடச்சந்தி" தளத்தில் "தரணி ஆண்ட தமிழருக்கு தை முதல் நாளே தமிழ்ப் புத்தாண்டு" எனும் பத்தியை பதிவு செய்துள்ளார், அதில் தமிழர்களின் புத்தாண்டுக்குரிய நாள் தைப்பொங்கல் என்பதனை ஆதாரபூர்வமாக நிரூபிக்கத் தவறிவிட்டார்.

யாருக்கோ துதி பாட வேண்டும் என்பதற்காக எழுதியது போல் தெரிகின்றது, ஆதியில் தமிழர் உலகப்பரப்பில் பரந்து வாழ்ந்தான் என்பது அறிவியலாளர்களின் கருத்து இதில் எவருக்கும் மாற்றுக் கருத்து கிடையாது.

ஹேமா சொல்லியது போல் கணிக்கப்பட்ட நாட் கணக்குகள் தொண்டுதொட்டு பஞ்சாங்கத்தின் மூலமே இன்றும் அறியக் கூடியதாகவுள்ளது, கோண்டாவிலுக்கு அருகிலுள்ள இணுவில் கிராமத்தில் பதிவு செய்யப்படும் பஞ்சாங்கத்தில் பல உண்மையான விடயங்கள் உள்ளன என்பது ஹேமாவுக்குத் தெரியாமல் இருப்பது வேடிக்கையாக இருக்கின்றது.

பஞ்சாங்கங்களில் வாக்கிய, திருக்கணித பஞ்சாங்கங்கள் புகழ்பெற்றன, இந்தப் பஞ்சாங்கங்களில் வாக்கிய பஞ்சாங்கம் சூரியன் மேடராசியில் பிரவேசிப்பது முதல் மீனராசியை விட்டு நீங்கும் வரையும் உள்ள காலம் சௌர வருஷம் என்று கூறுகிறது. திருக்கணித பஞ்சாங்கம் மேடராசியின் தொடக்கமாகிய அச்சுவினி நட்சத்திரத்தில் சூரியன் பிரவேசிக்கும் காலம் தொட்டு, மீனராசியின் அந்தமான ரேவதி நட்சத்திரத்தில் நின்று நீங்கும் வரையில் உள்ள காலம் சௌர வருஷம் என்றும் கூறுகின்றது, இவை அனைத்தும் விஞ்ஞான ரீதியில் பார்க்கும் போது உண்மை புலனாகின்றது.

கார்த்திகை மாதத்தில் தொடங்கும் முதல் மழையைத் தொடர்ந்து விவசாயி தனது உழவுத் தொழிலுக்குத் தயாராகின்றான், இக் காலத்திலேயே உழவர்கள் காடுகளை வெட்டிக் கழனியாக்கி வேளாண்மைப் பயிர்ச் செய்கைக்குத் தயாராகின்றார்கள் தை மாதமானது உழவருக்கு வேலைவெட்டி நிரம்பிய மாதமாகும், புவியியல் ரீதியாகப் பார்த்தாலும் தை மாதமானது இலங்கையருக்கு மாரி காலமாகும், இக் காலம் வறுமை நிறம்பிய காலமென்றால் மிகையாகாது, இக் காலத்தில் மழை சற்று ஓய்வு பெறும் காலம் தை நடுப் பகுதியாகும், இக் காலத்தில் உழவன் பாடுபட்டு பயிர் செய்த வேளாண்மை தனது பொற்கதிர்களை உலகுக்கு காண்பிக்கும், இதில் சிவந்த கதிர்களை அறுவடை செய்து அதை அரிசியாக்கி, அதனைக் கொண்டு உதவி செய்த சூரியனுக்கும், மறுநாள் மாடுகளுக்கும் நன்றி தெரிவிக்கும் நாட்களே தைப்பொங்கலும், மாட்டுப் பொங்கலும் ஆகும்.

இவை தமிழர்களின் புத்தாண்டு நாட்களல்ல, பயிர்ச் செய்கையில் ஈடுபட்ட விவசாயி அறுவடை அனைத்தும் முடித்து நெல் மணிகளை வீட்டில் கொண்டு சேகரித்து வைத்து குடும்பத்துடன் கூடிக் குலாவும் காலமே சித்திரை மாதமாகும், இந்தக் காலத்தில் உற்றார் உறவினர்கள் அனைவரும் இணைந்து சிறப்பிக்கும் காலமான சூரியன் மேடராசியில் பிரவேசிக்கும் முதல் நாளே சித்திரை வருடப்பிறப்பாகும்.

மேலதிக விபரம்: "வியாபாரிமூலை" இந்து வருடப்பிறப்பு

விடுதலைப் போரும் விடையில்லா யுத்தியும்!

தமிழீழ விடுதலைப் புலிகளின் அரசியல் நிர்வாகத் தலைநகரமாக விளங்கிய கிளிநொச்சி நகரம் கடந்த 2009 ஜனவரி இரண்டாம் நாள் ஸ்ரீலங்கா படைதரப்பினரின் பூரண கட்டுப்பாட்டின் கீழ் வீழ்ந்ததைத் தொடர்ந்து பலரும் பலதரப்பட்ட கருத்துக்களைக் கூறி வருகின்றார்கள், அந்த வரிசையில் இப்போது தமிழ் தேசிய கூட்டமைப்பின் பாராளுமன்ற உறுப்பினர் திரு.என்.ஸ்ரீகாந்தா தனது கருத்தையும் தெரிவிக்க தவறவில்லை.

கிளிநொச்சி நகரத்தின் வீழ்ச்சி தமிழீழ விடுதலைப் புலிகளின் கெரில்லாப் போராட்டத்தின் ஆரம்பம் என ஸ்ரீகாந்தா கருத்து தெரிவித்திருப்பதனை அனேகமான ஊடகங்கள் பதிவு செய்திருந்தன. இதனை எந்தளவுக்கு ஏற்றுக் கொள்வதென்றே தெரியாமல் உள்ளது, ஏனெனில் விடுதலைப் புலிகள் எப்போதோ கெரில்லா தாக்குதல் முறைக்கு மாறி விட்டார்கள் என்பதே பொருத்தமானதாகும்.

1976 வைகாசிக்கு முதல் இருந்தே புதிய தமிழ் புலிகளாக தொடங்கி தம்பி எனும் வே.பிரபாகரனைத் தலைவராகக் கொண்டு தமிழீழ விடுதலைப் புலிகளாக மாறிய காலமீறாக கெரில்லாப் போராட்டத்திலேயே நம்பிக்கை வைத்து தாக்குதலை நடாத்தி வந்தார்கள் விடுதலைப் புலிகள், ஆனால் இந்தக் கெரில்லாப் போராட்டம் வெற்றி தராது என்பதால் இதனை வெகுசனப் போராட்டமாக மாற்ற வேண்டிய தேவை விடுதலைப் புலிகளுக்கு அவசியமாக இருந்தது, ஏனெனில் ஏனைய ஈழ விடுதலை அமைப்புக்கள் முன்னமே வெகுசனப் போராட்டத்துக்கு மக்களைத் தயார் படுத்தி விட்டார்கள்.

தமிழீழ விடுதலைப் புலிகளின் ஏகப் பிரதிநிதித்துவப் போக்கினால் காலவோட்டத்தில் மற்றைய ஈழ விடுதலை அமைப்புக்கள் காணமற் போக விடுதலைப் புலிகளுக்கும் ஸ்ரீலங்கா அரச படைகளுக்குமான யுத்தம் தொடர்ந்தது, இலங்கை இந்திய அமைதி உடன்படிக்கையைத் தொடர்ந்து மீண்டும் புத்துயிர் பெற்ற ஏனைய அமைப்புக்களான ஈ.பி.ஆர்.எல்.எவ், புளொட், ஸ்ரீகாந்தா சார்ந்த ரெலோ மற்றும் பாலகுமார் இல்லாத ஈரோஸ் இறுதியாக ஈபிடிபி போன்றன மாற்றுக் கட்சிகள் எனும் பெயரில் அரசாங்கத்துடன் உறவைப் பேணி உதவிகளைப் பெற்று வந்தன.

இந்தக் காலத்தில் அரசாங்கத்தின் துணைப் படையென பதிவு செய்து ஆயுத உதவியும், பெருமளவு பணமும் பெற்ற மேற்கூறப்பட்ட அமைப்புக்கள் தமிழீழ விடுதலைப் புலிகளைக் காட்டிக் கொடுக்கவென நடத்திய தர்பார்கள் கொஞ்ச நஞ்சமல்ல, இதற்கு தலைநகரின் பம்பலப்பிட்டியில் தலைமையகத்தை வைத்திருந்த செல்வம், சிவாஜிலிங்கம், ஸ்ரீகாந்தா , போன்றோர் விதிவிலக்கானவர்களல்ல.

பிராந்திய ரீதியில் அரச ஊக்குவிப்புடன் இம் மாற்று அமைப்புக்களுக்கான உதவிகள் தொடர்ந்தன, மட்டக்களப்பில் சுரேஸ் பிரேமச்சந்திரன், வரதராசப்பெருமாள் போன்றோரின்
ஈபிஆர்எல்எவ் ராஸிக், இரெட்ணம் தலைமையிலும், அம்பாறையில் சங்கர், ஜெகதீஸ், வாகீசன் போன்றோரினால் ஈபிடிபியும், திருகோணமலையில் வினோதலிங்கம், சிவாஜிலிங்கம், செல்வம் சார்ந்த ரெலோவினாலும், வவுனியாவில் சித்தார்த்தன், மாணிக்கம்தாஸனின் புளொட்டினாலும் யாழ்ப்பாணத்தில் தீவகம் அடங்கலாக டக்ளஸ் தேவானந்தாவின் ஈபிடிபியினராலும் அரசாங்கத்தின் ஆசியுடன் புலிச் சுத்திகரிப்புடன் கூடிய வெகுசனப் போராட்டங்கள் தொடங்கின.

இந்தக் காலத்தில் தேர்தலுக்கு முகம் கொடுக்க வேண்டிய சூழ்நிலை ஜனநாயக நீரோட்டத்தில் இணைந்துள்ள மேற்படி இயக்கங்களுக்கு ஏற்பட்டது, ஆனால் மக்களிடையேயான செல்வாக்கு இவ் அமைப்புக்கள் அனைத்துக்கும் கிடைக்கவில்லை, திருகோணமலையில் திரு.சம்பந்தனின் தமிழர் விடுதலைக் கூட்டணிக்கு கணிசமான ஆதரவு இருந்தது, அதேபோல் மட்டக்களப்பில் தமிழர் விடுதலைக் கூட்டணிக்கும், அம்பாறையில் ஈபிடிபி மற்றும் முஸ்லிம் காங்கிரசுக்கும், வவுனியாவில் ரெலோ மற்றும் புளொட்டுக்கும், யாழ்ப்பாணம் டக்ளஸின் ஈபிடிபிக்கும் அதிகமான வாக்குவங்கி இருந்தது.

தேர்தல் வந்தது எதிர்பார்த்தபடியே மட்டக்களப்பில் தமிழர் விடுதலைக் கூட்டணியும், அம்பாறையில் ஈபிடிபியும், முஸ்லிம்காங்கிரசும், திருகோணமலையில் தமிழர் விடுதலைக் கூட்டணியும், வவுனியா மற்றும் மன்னாருக்கு செல்வம் அடைக்கலநாதன், சிவசக்தி ஆனந்தன் மற்றும் சித்தார்த்தனும் அவரைச் சார்ந்தவர்களும், யாழ்ப்பாணத்தில் டக்ளஸ் தேவானந்தாவுடன் அவரைச் சார்ந்தோர்களும் தெரிவானார்கள், இப் பாராளுமன்றத்துக்கு ஆளும் கட்சியாக ஐக்கிய தேசியக் கட்சியும் பிரதமராக ரணில் விக்கிரமசிங்கவும் தெரிவு செய்யப்பட்டார்கள்.

திரு.ரணில் விக்கிரமசிங்கவின் முயற்சியினால் தமிழீழ விடுதலைப் புலிகளுக்கும், அரசாங்க படைகளுக்குமான யுத்த தவிர்ப்பு ஒப்பந்தம் கைச்சாத்தானது. இக் காலத்தில் ஜனாதிபதியாக இருந்த சந்திரிக்கா பண்டாரநாயக்க குமாரணதுங்கவின் பதவிக் காலம் முடிவுற்றதால், மகிந்த ராஜபக்ஷ ஜனாதிபதியானார்.

பாராளுமன்றத்தினுள் பிரதமராக இருந்த ரணில் விக்கிரமசிங்கவின் ஆதரவு போதாமையால் எந்தவித முடிவுகளையும் ஜனாதிபதி மகிந்த ராஜபக்ஷவுக்கு எடுக்க முடியாத நிலை ஏற்பட்டது, இவரின் சகல திட்டங்களுக்கும் ஆளும் கட்சியாக இருந்த ஐக்கிய தேசியக் கட்சி முட்டுக்கட்டையாக இருந்தது, இதனால் ஜனாதிபதியெனும் அதிகாரத்தைப் பயன்படுத்தி சொற்ப காலத்தினுள்ளே பாராளுமன்றத்தைக் கலைத்து புதிய தேர்தலுக்கு ஏற்பாடு பண்ணினார்.

யாழ்ப்பாண மாவட்டத்தில் டக்ளஸுக்கு இருக்கும் வாக்குவங்கியை உடைத்து சுரேஸ் பிரேமச்சந்திரன், சிவாஜிலிங்கம், மாவை சேனாதிராஜா மற்றும் ஆனந்தசங்கரி போன்றோர் தங்களுக்கு புதிய வாக்குவங்கியை உருவாக்கி அதன் மூலம் பாராளுமன்றக் கதிரை கிடைப்பதென்பது பகற்கனவு என்பதைப் புரிந்து கொண்டு புலியெதிர்ப்புக் கொள்கையில் இருந்து விடுபட்டு, பிரபாகரன் தான் ஏகத் தலைவன் எனும் கொள்கையை ஏற்று தமிழீழ விடுதலைப் புலிகளுடன் கை குலுக்கிக் கொண்டனர்.

அடுத்து வந்த தேர்தலில் ரணில் விக்கிரமசிங்கவின் ஐக்கிய தேசியக் கட்சி தோற்கடிக்கப்பப்பட்டு மகிந்தவின் ஐக்கிய மக்கள் கூட்டமைப்பு வெற்றி பெற்றது, பாராளுமன்ற ஆசனம் கிடைக்கும் என்பது முயற்கொம்பைக் காண்பதற்கு ஒப்பானது என நினைத்திருந்த சுரேஸ் பிரேமச்சந்திரன், சிவாஜிலிங்கம், மாவை சேனாதிராஜா போன்றோருக்கு யாழ்பாண மாவட்டத்தில் தமிழீழ விடுதலைப் புலிகளின் கள்ள வாக்குகளின் மூலம் ஆசனம் கிடைத்தது, ஆனந்தசங்கரி தமிழ்த் தேசிய கூட்டமைப்பினருடன் உறவை முறித்துக் கொண்டதால் தோல்வியைத் தழுவிக் கொண்டார்.

இந்தப் ஆசனப் பட்டியலில் தெரிவாகாமல் தொங்கிக் கொண்டு இருந்த திரு. என்.ஸ்ரீகாந்தா, இறந்த ஒரு பா.உ வின்
வெற்றிடத்துக்கு தமிழீழ விடுதலைப் புலிகளின் சிபாரிசுவில் நியமிக்கப்பட்டார், இந்தப் பதவியை தக்க வைத்திருக்க வேண்டுமெனில் துதி பாடி, வாய்க்கு வருவனவற்றையெல்லாம் அரசியலாக்கிப் பார்க்க வேண்டியது தான் என நினைத்து கருத்து தெரிவித்துள்ளார்.

1984 ஆம் ஆண்டுக்கு முன்பாகவே வெகுசன இணைப்பினால் மரபுவழிப் போராட்டத்தை நடத்தி தமிழீழத்தை வென்றெடுக்க முடியுமென தமிழீழ விடுதலைப் புலிகள் தீர்மானித்தார்கள், கெரில்லா போராட்டம் நிறுத்தப்பட்டு மரபுவழிப் போராட்டம் தொடர்ந்தது.

பல விடுதலைப் புலி உறுப்பினர்கள் களப்பலியானார்கள், மாவீரர்கள் பட்டியல் நீண்டது, தமிழீழம் கைக்கெட்டிய தூரத்திலெனக் கற்பனை செய்து தம் உயிரையே தியாகம் செய்தார்கள் எதுவும் அறியாத அப்பாவி அடிமட்டவிடுதலைப் புலிகள்.

மாவிலாறு தமிழீழ விடுதலைப் புலிகளின் திருகோணமலை மாவட்ட பொறுப்பாளர் திரு.எழிலனினால் பூட்டப்பட்டதனைத் தொடர்ந்து தமிழீழ விடுதலைப் புலிகளுக்கெதிரான ஸ்ரீலங்கா அரச படைகளுக்கூடான யுத்தம் பூதாகரமானது. யுத்த தவிர்ப்பு ஒப்பந்தம் கேள்விக் குறியானது.

தமிழீழ விடுதலைப் புலிகள் கெரில்லா யுத்த முறைக்கு மாறினார்கள், கிளைமோர், கண்ணிவெடி, குண்டுத் தாக்குதல், தற்கொலைத் தாக்குதல் போன்றன தொடர்ந்தன, என்றாலும் திருகோணமலையைத் தக்க வைத்திருக்க முடியாமல் பின் வாங்கினர் விடுதலைப் புலிகள்.

இதே வரிசையில் மட்டக்களப்பின் குடும்பிமலை, புலிபாய்ந்தகல் அம்பாறையின் கஞ்சிகுடியாறு போன்ற அடர்ந்த காட்டுப் பகுதி போன்றன அரச படை வசமாகவே தமிழீழ விடுதலைப் புலிகள் தந்திரோபாய பின்வாங்கல் எனக் கூறி வன்னி திரும்பினர், ஆனாலும் மட்டக்களப்பு, அம்பாறை மாவட்டங்களில் தமிழீழ விடுதலைப் புலிகளின் கெரில்லாத் தாக்குதல்கள் தொடர்கின்றன.

இதோ போன்று முகமாலை, பூநகரி போன்ற இடங்களையும் விடுதலைப் புலிகள் இழந்த போது இவை முக்கியமற்ற பிரதேசங்களெனவும், தந்திரோபாய பின்வாங்கலென்றெல்லாம் பிரசாரம் செய்தனர், அதே வரிசையில் கிளிநொச்சியையும் இழந்த போது முக்கியத்துவம் இல்லாத பிரதேசமென்றே கூறுகின்றனர்.

இவை அனைத்தும் முக்கியமற்ற பிரதேசமெனில் எதற்காக இவ்வளவு கால யுத்தமும், அனியாய உயிரிழப்புகளும் எனக் கேட்கத் தோன்றுகின்றது. வீட்டுக்கு ஒருவர் போராட்டத்துக்கு வர வேண்டும், உதவிகள் செய்ய வேண்டுமென்றெல்லாம் எதற்காக இவ்வளவு ஆர்ப்பரிப்புக்கள், பாம்புக்கடி, வெள்ளப் பெருக்கு, தொற்று நோய், செல்வீச்சு மற்றும் பட்டினிச் சாவு போன்றனவற்றுக்கு தினமும் பலியாகிக் கொண்டிருக்கும்
இரு நூறாயிரத்துக்கும் மேற்பட்ட அப்பாவி மக்களின் நிர்க்கதி வாழ்க்கையால் அடைந்த பயன் என்ன?

மாவிலாறை இழந்த போதே மீதமுள்ள பகுதிகள் அனைத்தும் முக்கியமற்ற பிரதேசங்கள் எனக் கூறி விட்டு காட்டுக்குச் சென்றிந்தால் இவ்வளவு உயிரிழப்புகளும் ஏற்பட்டிருக்காது,
ஆயுத தளபாடங்களையும், இயக்க முக்கியத்தர்களையும் பாதுகாக்கவே இவ்வளவு உயிரிழப்புகளும் ஏற்படுத்தப்பட்டனவெனில் எதிர்காலத்தில் இன்னும் எதற்காக திரு என்.ஸ்ரீகாந்தா கூறும் கெரில்லாப் போராட்டம்.

இன்றைய கள நிலையை எடுத்துக் கொண்டால் இன்னும் சொற்ப நேரத்தில் ஆனையிறவுடன் கூடிய ஏ - 9 பாதை அரச படையினரால் விடுவிக்கப்படலாம், அதனை அடுத்து முல்லைத்தீவும் இதே நிலையை எட்டலாம் அதன் பின்னரும் அரச படைகளால் போராளிகளைக் கொல்ல முடிந்ததா, ஆயுதங்களை மீட்க முடிந்ததா குறைந்தபட்சம் விடுதலைப் புலிகளின் தஸ்தாவேஜுக்களையாவது கைப்பற்ற முடிந்ததாவென அர்த்தமற்று வினா தொடுக்கலாம், ஆனால் இந்த பெறுமதி இல்லாத மண்ணுக்கு எதற்காக இத்தனை ஆயிரம் விலை மதிப்பற்ற உயிர்கள் காணிக்கையாக்கப்பட்டன என்பதே இன்றைய விடுதலைப் போரும் விடையில்லா யுத்தியும் ஆகும்.

அப்புச்சியின் விம்பங்களும் அரசாங்க பயங்கரவாதப் பட்டியலும்!

இணையத்தின் எமது சக பதிவர் தோழர் அப்புச்சி தனது விம்பங்கள் எனும் தமிழர்களின் உரிமைக் குரலில் "இலங்கை அரசின் அந்தக்கால பயங்கரவாதப் ப‌ட்டியல்......" எனும் தலைப்பில் அருமையான வரலாற்றுக் கட்டுரையைப் பதிவு செய்துள்ளார், இக் கட்டுரை இன்னும் விரிவு செய்யப்பட வேண்டியது கட்டாயமாகும், ஏனெனில் இன்னும் பல விடுதலைக் குழுக்களின் பெயர்கள் விடுபட்டுள்ளதாக ஒரு பிரமை.

வலைப் பதிவர் இக் கட்டுரையில் முக்கியமாக இக் குழுக்களின் அல்லது இவ் இயக்கங்களின் தலைவர்களின் பெயர்களையும், இவர்களால் செய்யப்பட்ட முக்கிய தாக்குதல்கள் போன்ற விபரங்களுடன் ஆங்கில எழுத்துக்களால் குறிப்பிடப்படும் அவ்வியக்கங்களின் முழுப் பெயரையும் பதிவு செய்வது சிறப்பாக இருக்கும்.

இவ் ஈழ இயக்கங்களின் வரலாற்றுப் பதிவுகள் எமது எதிர்காலச் சந்ததிகளுக்கு நிச்சயம்
தேவையானவை, அவை பதிவு செய்த வரலாற்று உண்மைகளையும் மறக்காமல் அப்புச்சி பதிவு செய்வது காத்திரமானதாகும்.

உதாரணம்:

பத்மநாபா மற்றும் டக்ளஸ் தேவானந்தாவின் EPRLF இனரால் வெளியிடப்பட்ட வரலாற்று ஆவணமான ஈழம் முத்திரை.

மகேஸ்வரனைத் தலைமைத்துவமாகக் கொண்ட TEA இனரால் கொணரப்பட்ட அதிட்டலாபச் சீட்டு.

ஸ்ரீசபாரெத்தினம் மற்றும் தாஸ், பொபி போன்றோரின் TELO இனரால் யாழ்ப்பாண நகரத்தில் உருவாக்கப்பட்ட வாகன நெரிசலைத் தவிர்க்கும் பொலிஸ் சேவை.

உமாமகேஸ்வரனைத் தலைமையாகக் கொண்ட PLOT இனரால் யாழ்ப்பாண கோட்டையில் இருந்து ஸ்ரீலங்கா படையினரால் ஏவப்படும் செல் தாக்குதலில் இருந்து பொது மக்கள் தப்பிக்கக் கூடிய வகையில் போதனா வைத்தியசாலையைச் சுற்றி அமைக்கப்பட்ட ஓசை எழுப்பக் கூடிய கருவிகள் மற்றும் பாதுகாப்பு அரண்கள்.

விம்பங்கள் எனும் அப்புச்சியின் வலைப் பதிவில் பின்னூட்டமிடுவது கடினமாக இருப்பதால் அதனைச் சீர்படுத்துவதுடன், அதில் பதிவேற்றம் செய்யப்பட்டுள்ள விபரங்களுடன் இன்னும் பல சாதக பாதக விபரங்களையும் சேர்த்துக் கொள்வது வரலாற்றுத் தேவையாகும்.

ஸ்ரீலங்கா அமைச்சரவையில் திடீர் மாற்றம், ஊடகத்துறை ஜனாதிபதியிடம்!

ஸ்ரீலங்கா அமைச்சரவையில் இன்று திடீர் மாற்றங்கள் ஏற்பட்டன, பொது நிர்வாக உள்நாட்டு அலுவல்கள் அமைச்சராக பதவி வகித்த திரு.கருஜெயசூரிய அரசாங்கத்திலிருந்து விலகி ஐக்கிய தேசியக் கட்சியில் மீண்டும் இணைந்து கொண்டிருந்ததையடுத்து ஏற்பட்ட வெற்றிடத்தை நிரப்பும் முகமாக ஜனாதிபதி மஹிந்த ராஜபக்ஷவினால் இம் மாற்றங்கள் ஏற்படுத்தப்பட்டன.
ஊடகத் துறை அமைச்சராகப் பதவி வகித்து வந்த திரு.அனுர பிரியதர்சன யாப்பா முதலீட்டு ஊக்குவிப்பு அமைச்சராகவும், முதலீட்டு ஊக்குவிப்பு அமைச்சராக பதவி வகித்த திரு.சரத் அமுனுகம பொது நிருவாக உள்நாட்டு அலுவல்கள் அமைச்சராகவும் நியமனம் பெற்றுள்ளனர்.

எஞ்சியுள்ள ஊடகத்துறை அமைச்சினை ஜனாதிபதி மஹிந்த ராஜபக்ஷ தனது கட்டுப்பாட்டின் கீழ் கொண்டு வந்துள்ளார்.

புத்தாண்டு வாழ்த்துக்கள் - 2009

பிறக்கும் புத்தாண்டில் தீயன கழிந்து நல்லன பெருக வேண்டுமென "களத்துமேடு" வாழ்த்துகின்றது.

யாழ்ப்பாண எதிர்கால நோக்கு - பரிசளிப்பு விழா!

யாழ்ப்பாணத்தின் எதிர்கால நோக்கு எனும் தொனிப்பொருளில் தொழில்சார் மற்றும் கல்விக் கண்காட்சியும் களிப்பூட்டு விழாவும் யாழ்ப்பாண மாவட்ட ஸ்ரீலங்கா இராணுவக் கட்டளைத் தளபதி மேஜர் ஜெனரல் சந்திரஸ்ரீயின் ஏற்பாட்டில் யாழ்.வேம்படி மகளிர் கல்லூரியில் இடம்பெற்றிருந்தது, இந் நிகழ்வில் ஒரு இலட்சத்துக்கும் அதிகமான பொது மக்கள் கலந்து கொண்டதுடன் ஸ்ரீலங்கா ஜனாதிபதி மஹிந்த ராஜபக்ஷ செயற்கைக்கோள் மூலமாக அகன்ற தொலைக்காட்சியில் தமிழில் உரையாற்றினார் என்பது குறிப்பிடத்தக்கது.

.

இந் நிகழ்வில் இடம்பெற்ற பாடல் போட்டியில் தோற்றி முதலாம் இடத்தைப் பெற்ற யாழ்ப்பாண பல்கலைக் கழக நுண்கலைப் பீட 3 ஆம் வருட மாணவி றஞ்சன் தாரிணி களிப்பூட்டு விழாவின் போது "உயிரே உயிரே" எனும் பாடலைப் பாடி "வடக்குத் தாரகை" (North Star) எனும் கிரீடத்தை அமைச்சர் டக்ளஸ் தேவானந்தாவிடமிருந்து பெற்றுக் கொண்டதுடன், அசோஷியேற்றட் மோட்டார் கொம்பனி அன்பளிப்புச் செய்த மாருதி சுஷுக்கிக் காரினை முதலாம் பரிசாகப் பெற்றுக்கொண்டுள்ளார்.

இங்கு இடம்பெற்ற போட்டியில் இரண்டாம் இடத்தினைப் பெற்ற மீசாலையைச் சேர்ந்த விழிப்புலன் இழந்த திரு.குலேந்திரன் ஜெகதீசன் இரண்டாம் பரிசான இரு சக்கர உழவு இயந்திரத்தினைப் பெற்றுக்கொண்டார்.

.


மூன்றாம் இடத்தினை வென்ற யாழ்ப்பாண பல்கலைக் கழக சமூக விஞ்ஞான பிரிவு மாணவனான, சாவகச்சேரியைச் சேர்ந்த திரு.மகாலிங்கம் தயாபரன், மூன்றாம் பரிசாக உந்துருளியைப் பரிசாகப் பெற்றுள்ளார்.

ஜனாதிபதி மஹிந்தவின் தமிழ் உரையின் ஒளிப்பேழை

சீமானும் செல்வியும் - ஷோபாசக்தி

இயக்குனர் சீமான், கொளத்தூர் மணி, பெ. மணியரசன் உள்ளிட்டவர்கள் அண்மையில் தமிழக அரசால் கைது செய்யப்பட்டதைத் தொடர்ந்து இவர்களின் கைதுகளைக் கண்டித்தும் தமிழக அரசின் கருத்துச் சுதந்திர மறுப்பு எதோச்சதிகாரத்தைக் கடுமையாகச் சாடியும் வலைப்பதிவுகளில் தோழர்கள் எழுதிக் குவித்துள்ள கட்டுரைகளைப் படிக்கையில், கருத்துச் சுதந்திரத்தை வலியுறுத்தி நீண்ட நாட்களாகவே பேசியும் எழுதியும் வருபவன் என்ற முறையில் உள்ளபடியே எனது கண்கள் பனிக்கின்றன. இந்த வலைப் பதிவாளர்களல்லவா எனது தோழர்கள் எனத் திரும்பத் திரும்ப எனது உதடுகள் முணுமுணுக்கின்றன.

“நீ சொல்லும் கருத்தில் எனக்கு எள்ளளவும் உடன்பாடில்லை, ஆனாலும் அதைச் சொல்வதற்கு உனக்குள்ள உரிமைக்காக எனது உயிரைக் கொடுத்துப் போராடவும் நான் தயார்” என்ற வோல்தயரின் புகழ்பெற்ற கூற்றை வெறுமனே வீம்புக்கு உச்சரிப்பவர்களில் நானும் ஒருவனல்ல. அந்தக் கூற்றை நான் முற்று முழுதாக விசுவாசிப்பவன். இந்திய அரசு, இலங்கை அரசு, அமெரிக்க அரசு என எது குறித்தும் எவர் வேண்டுமானாலும் தமது கருத்துகளைக் கூறலாம். அது ஆதரவாகவும் இருக்கலாம் அல்லது எதிராகவும் இருக்கலாம், எதுவாகவும் இருக்கலாம். அதைச் சொல்வதற்கு சாமான்யர்களுக்கும் தடையற்ற சுதந்திரம் வேண்டும். இதற்குப் பெயர்தான் முழுமையான கருத்துச் சுதந்திரம். அந்தக் கருத்துச் சுதந்திரம் மறுக்கப்படும் போது தடைமீறலும், உருவப்பொம்மை எரிப்புகளும் காலணியால் மூஞ்சிக்கு எறிதலும் மக்கள் திரளின் இயல்பான போராட்ட வடிவங்களே! அவை அறம் சார்ந்த நெறிகளே!

விடுதலைப் புலிகளையும் தமிழ்த் தேசிய வெறியையும் நிராகரிப்பவன் என்ற முறையில் நான் சீமான் உள்ளிட்டவர்கள் மீதான எனது விமரிசனத்தை ஏற்கனவே வைத்துள்ளேன். அதே வேளையில் கொளத்தூர் மணி போன்ற திராவிட இயக்கங்களைச் சேர்ந்தவர்களின் பார்ப்பன எதிர்ப்பு, சாதியொழிப்பு, சமூகநீதிக்கான போராட்டம் போன்ற சீரிய அரசியல் பங்களிப்புகளை நாம் மறந்துவிட இயலாது. பார்ப்பனிய ஊடகங்களும் காங்கிரஸ் கட்சியினரும் இந்தக் கைதுகளை நியாயப்படுத்துவதன் பின்னணியில் அவர்களின் பாரம்பரியத் திராவிட இயக்க எதிர்ப்பும் ஒரு ஊக்கியாகச் செயற்படுவதையும் நாம் கவனிக்கலாம். உண்மையில் கொளத்தூர் மணி, சீமான் போன்றவர்கள் அரசியல் அதிகாரங்களற்ற சாதாரணர்கள். புலிகளுக்கு ஆதரவாகப் பேசும் பால் தக்கரேயையோ மருத்துவர் இராமதாஸையோ இப்படிக் கைதுபண்ணிவிட இந்திய அரசால் முடியுமா? இந்திய ‘ஒருமைப்பாட்டுக்கு’ பங்கம் விளைவிப்பவர்களைக் கைது செய்வதென்றால் நம்பர்1 பயங்கரவாதி நரேந்திர மோடியையல்லவா முதலில் கைதுசெய்ய வேண்டும்.

சீமான், கொளத்தூர் மணி போன்றவர்களின் கைதுக்காக இந்தச் சிலிர்ப்புச் சிலிர்ப்பவர்கள் இந்தியா முழுவதும் காலவரையற்றுச் சிறைகளில் வாடும் அல்லது ‘என்கவுண்டர்’களில் சுட்டுத்தள்ளப்படும் நக்ஸ்பாரிகள் குறித்தோ இஸ்லாமியர்கள் குறித்தோ காஷ்மீரிகள் குறித்தோ ஏன் எதுவும் பேசுவதில்லை என்றொரு கேள்வி சிலரால் எழுப்பப்படுகிறது. இந்தக் கேள்வி தருக்கத்துக்குப் பொருந்துமேயொழிய நடைமுறைக்கு உதவாது. தீபெத் மீதான ஆக்கிரமிப்பைக் கண்டிக்காதவர்கள் ஈராக் மீதான ஆக்கிரமிப்பைக் கண்டிக்கக் கூடாது, திண்ணியம் கொடுமை குறித்துப் பேசாதவர்கள் கயர்லாஞ்சிக் கொடுமைகள் குறித்துப் பேசக் கூடாது என்றெல்லாம் நாம் சொல்ல முடியுமா என்ன. குறிப்பிட்ட இந்த அநீதியைக் கண்டித்தாவது பேசுகிறார்களே என்று நாம் அவர்களை ஆதரிப்பதும் அவர்களோடு இணைந்து நாமும் குறிப்பிட்ட அநீதியைக் கண்டிப்பதும்தானே சரியாயிருக்க முடியும். ஆனால் இந்தச் சந்தர்ப்பத்தைப் பயன்படுத்தி பிற அநீதிகளுக்கு எதிராகவும் குரல் கொடுக்க வேண்டும் என நாம் அவர்களிடம் கோர முடியும். குறிப்பிட்ட விடயத்தில் வெளிப்படும் அவர்களின் சனநாயக் குரலும் போராட்டப் பண்பும் உலகம் தழுவிய பார்வையாக விரிவடைய வேண்டும் என நாம் வேண்டிக்கொள்ள முடியும்.

முக்கியமாக சீமான், கொளத்தூர் மணி போன்றவர்களின் கைதுகளுக்காகக் கொந்தளிப்பவர்களில் பெரும்பாலானோர் விடுதலைப் புலிகளின் ஆதரவாளர்களாக அல்லது அனுதாபிகளாயிருப்பதால் இந்தத் திடீர்க் கருத்துச் சுதந்திர போராளிகளுக்கு, கருத்துச் சுதந்திரத்துக்கும் விடுதலைப் புலிகளுக்கும் உள்ள பொருந்தாத் தொடர்பு குறித்து இங்கே சற்று விளக்கவதும் பொருத்தமானதே. “தூங்குக தூங்கிச் செயற்பால தூங்கற்க, தூங்காது செய்யும் வினை” என்கிறது தமிழ்மறை.

தமிழக அரசால் கைது செய்யப்பட்டிருப்பவர்களுக்கு இம்முறை பிணை மறுக்கப்பட்டிருப்பினும் அடுத்தடுத்த தவணைகளில் அவர்கள் வெளியே வருவார்கள். கொளத்தூர் மணி வருவது தாமதமாக வாய்ப்புகளிருப்பினும் அவரும் வெளியே வருவார் என்பது நிச்சயம். இவர்கள் மீதான விசாரணைகள் நடந்தாலும் அது நீதிமன்றங்களில் பகிரங்கமாக நடத்தப்படும். இவர்களுக்குத் தங்கள் தரப்பு நியாயங்களைச் சொல்வதற்கும் தங்களுக்கென வழக்கறிஞர்களை அமர்த்திக்கொள்ளவும் வாய்ப்புகள் வழங்கப்படும். “மாங்குயில் கூவிடும் பூங்சோலை எம்மை மாட்ட நினைக்கும் சிறைச்சாலை” எனச் சிறைச்சாலையைப் பூஞ்சோலையாக உருவகித்துச் சீமானும் மணியும் தாரளமாகப் பாடலாம். அப்படிப் பாடுவதுதான் திராவிட இயக்க மரபு. அப்படிப் பாட வாய்ப்புக் கொடுத்திருப்பது இந்திய அரசியல் சட்டத்தின் மரபு.

ஆனால் தோழர்களே புலிகளால் கைது செய்யப்பட்டவர்களின் நிலை என்ன? விஜிதரன் எங்கே? தில்லை எங்கே? தீப்பொறி கோவிந்தன் எங்கே முருகநேசன் எங்கே? மத்தியாஸ் எங்கே? சின்ன மெண்டிஸ் எங்கே? பதுமன் எங்கே? கையில் மாற்றுடைகளுடன் அன்ரன் பாலசிங்கத்தின் வீட்டுவாயிலில் உண்ணாவிரதம் இருக்கச் சென்ற மாத்தையா எங்கே? புலிகளின் சிறையில் ஒரே இரவில் அருணாவால் கொல்லப்பட்ட அய்ம்பத்தெட்டு உயிர்களுக்கும் வகையென்ன? பதிலென்ன? இப்படியாகப் புலிகளால் அவர்களின் சிறையில் சாகடிக்கப்பட்ட நூற்றுக்கணக்கான உயிர்களுக்கான நீதியை நாம் யாரிடம் கோருவது? இங்கே மாத்தையாவின் அரசியலுக்கோ சின்ன மெண்டிஸின் அரசியலுக்கோ வக்காலத்து வாங்குவதல்ல எனது நோக்கம். புலிகள் தங்களால் கைதுசெய்யப்படுபவர்களை எப்படி நடத்துகிறார்கள் என்பதைச் சொல்லவே மேலுள்ளவர்களை உதாரணம் காட்ட நேரிட்டது. பல்கலைக் கழக மாணவனாகட்டும் தங்கள் இயக்கத்தின் பிரதித் தலைவராகட்டும் எல்லா முரண்களையும் புலிகள் கொலைகளாலேயே தீர்த்து வைத்தார்கள். புலிகளின் இராச்சியத்திலே சவக்குழிதான் நீதிமன்றம். துப்பாக்கிச் சனியன்தான் நீதிபதி.

இன்று சீமானின் குரலும் கொளத்தூர் மணியின் குரலும் நசுக்கப்பட்டுவிட்டதாகத் துடிக்கிறோமே! அவர்களின் கருத்துச் சுதந்திர உரிமை பறிக்கப்பட்டுவிட்டதாகப் பதறுகிறோமே, இதே பதற்றமும் துடிப்பும் கொதிப்பும் புலிகளால் கருத்துச் சுதந்திரம் மறுக்கப்பட்டவர்களின் விசயத்திலும் நமக்கு இருக்க வேண்டுமல்லவா. தமக்கு உவப்பில்லாத கருத்துகளைச் சொன்னதால் புலிகளால் கொல்லப்பட்ட அறிவுஜீவிகளுக்கும் தொழிற்சங்கவாதிகளுக்கும் கலைஞர்களுக்கும் பத்திரிகையாளர்களுக்கும் மாற்று இயக்கப் போராளிகளும் மிதவாதக் கட்சித் தலைவர்களுக்கும் கணக்கில்லையே! விஜயானந்தன், விமலேஸ்வரன், ராஜினி திரணகம, அ.அமிர்தலிங்கம், நீலன் திருச்செல்வம், சின்னபாலா, அதிபர் இராசதுரை என்று எத்தனையோ மனிதர்களின் மாற்றுக் குரல்களை புலிகளால் துப்பாக்கியால் நிறுத்தியிருக்கிறார்கள். தொழிற்சங்கங்கங்கள், சாதி ஒழிப்பு அமைப்புகள் இடதுசாரிக்கட்சிகள் என எல்லாவகையான மாற்று அரசியல் இயக்கங்களும் புலிகளால் தடைசெய்யப்பட்டுள்ளன. புலிகளின் இந்தக் கருத்துச் சுதந்திர மறுப்பு ஈழத்தைத் தாண்டிப் புகலிடங்களுக்கும் பரவியது. சரிநிகர், தினமுரசு பத்திரிகைகள் புகலிட நாடுகளில் தடைசெய்யப்பட்டன. தொழிலாளர் பாதை, செந்தாமரை, மனிதம், தாயகம் போன்ற பல மாற்றுக் கருத்துப் பத்தரிகைகள் மிரட்டப்பட்டன. பத்திரிகையாளர்கள் தெருக்களில் வைத்துத் தாக்கப்பட்டார்கள்.

இம்முறை சீமான் கைது செய்யப்பட்டபோது ஆயிரம் முறை கைதாவதற்குத் தான் தயாராயிருப்பதாக அவர் முழங்கினார். செல்வியும் சீமானைப் போல கலைத்துறை சார்ந்தவர்தான். அவர் நாடக இயக்குனர், நடிகை மற்றும் கவிஞர். கவிதைக்கான சர்வதேச விருதான PEN விருதைப் பெற்றவர். புலிகளுக்கு மாற்றான கருத்துகளை அவர் பேசியதால் அவர் புலிகளால் கைது செய்யப்பட்டார். ஆனால் சீமானைப்போல “ஆயிரம் தடவைகள் சிறை செல்லவும் தயார்” என்று அவர் சொல்வதற்கு வாய்ப்புகள் ஏதுமிருக்கவில்லை. ஏனெனில் புலிகள் அவரை ஒரு தடவைதான் கைது செய்தார்கள், அப்படியே கொன்று புதைத்துவிட்டார்கள்.

நாங்கள் தமிழக அரசின் கைதுகளைக் கண்டிக்கிறோம். சீமான், கொளத்தூர் மணி ஆகியோரின் கைதால் கவலையுற்றிருக்கும் தோழர்களின் துயரில் நாங்களும் பங்கெடுக்கிறோம். புலிகளிடம் ஆயிரக்கணக்கானவர்களைப் பலி கொடுத்துவிட்ட துயரிலும் இனியும் பறிகொடுக்கப்போகும் பதற்றத்திலுமிருக்கும் எங்கள் உணர்வுகளிலும் பங்கெடுக்குமாறு அந்தத் தோழர்களைக் கேட்டுக்கொள்கிறோம். புலிகளின் கருத்துச் சுதந்திர மறுப்புக்கு எதிராக இந்தத் தோழர்கள் வருங்காலங்களிலாவது குரல் கொடுக்க வேண்டுமென விரும்புகிறோம். இதன் முலம்தான் கருத்துச் சுதந்திரம் மீதான அவர்களது வேட்கை முழுமை பெறுமென வலியுறுத்தவும் விரும்புகிறோம்.

இரு பின்குறிப்புகள்:

1. சிறைச்சாலை, பூஞ்சோலை என்பதெல்லாம் சீமான், கொளத்தூர் மணி போன்றவர்களின் விவகாரங்களில் சாத்தியமானது. ஆனால் அப்சல் குரு போன்ற எண்ணற்றவர்களுக்கு இந்திய அரசு சட்டபூர்வமான உதவிகளைக் கூட மறுத்திருக்கிறது என்ற புரிதலுடனேயே இந்தக் கட்டுரை எழுதப்பட்டிருக்கிறது.

2. புலிகளால் கொல்லப்பட்டவர்களின் பட்டியலைப் படிக்கும் ஒருவர் கொடுப்புக்குள் ஓர் ஏளனப் புன்னகையுடன் ‘துரோகிகள் கொல்லப்படத்தான் வேண்டும்’ என முணுமுணுப்பாரானால் அவருக்குக் கருத்துச் சுதந்திரம், வன்முறை எதிர்ப்பு, மணதண்டனை ஒழிப்புக் குறித்தெல்லாம் பேச எந்த யோக்கியதையும் கிடையாது என்பதை ஒருகணம் மனதில் நிறுத்திக்கொண்டு விட்ட இடத்திலிருந்து அவர் புன்னகையைத் தொடராலாம்.

நன்றி: சத்தியக் கடதாசி

வன்னிச் சமரில் கொல்லப்பட்ட ஸ்ரீலங்கா இராணுவச் சிப்பாய்களின் அடையாள அட்டைகள்!

வன்னியை நோக்கி முன்னேறி வரும் ஸ்ரீலங்கா படைதரப்பினரை எதிர்த்து 2008.12.21 ஆம் திகதி தமிழீழ விடுதலைப் புலிகள் எதிர்த் தாக்குதலை நடத்தியதில் பல இராணுவத் தளபாடங்களையும், ஸ்ரீலங்கா படையினரின் உடலங்களையும் கைப்பற்றியிருந்தனர்.

இச் சமரில் ஒரு ஸ்ரீலங்கா இராணுவச் சிப்பாய் உயிருடன் சிறை பிடிக்கப்பட்டிருந்தார், கைப்பற்றப்பட்டிருந்த சில உடலங்களில் தேசிய அடையாள அட்டைகளும், புகைப்படங்களும் மற்றும் இலக்கத்தகடும் காணப்பட்டன என்பதனை தமிழீழ விடுதலைப் புலிகள் அறிவித்துள்ளனர்.

1. பெயர்: செனரத் களுவாஞ்சிலாகே நுவன்குமார சேனரத்
பிறந்த திகதி: 1990.05.05
விலாசம்: வலிபில்லாவ, திஹல்ல
தேசிய அடையாள அட்டை இல: 901261563V

2. பெயர்: வட்டுவாவே ஹெதர சரத் நந்தஸ்ரீ
பிறந்த திகதி: 1987.04.27
விலாசம்: கண்டலம, தம்புள்ள
தேசிய அடையாள அட்டை இல: 871181047V

3. பெயர்: வலதர ஆராட்சியலாஹே அமித் ஜயதிலஹ
பிறந்த திகதி: 1989.04.17
விலாசம்: கலமடுஹஸ்தென்ன, பண்டாரவளை
தேசிய அடையாள அட்டை இல: 891082258V

4. பெயர்: ஜயதிஸ்ஸஹே ஜயந்த அருணகுமார
பிறந்த திகதி: 1986.11.14
விலாசம்: குஞ்சிக்குளம், குருந்தன்குளம்
தேசிய அடையாள அட்டை இல: 863190606V

5. பெயர்: சிங்கப்புலி முதியன்சலாஹே சமிர உதயங்க
பிறந்த திகதி: 1982.02.09
விலாசம்: கபுகஸ்தன்ன, பலாங்கொட
தேசிய அடையாள அட்டை இல: 820402901V


6. பெயர்: ரத்னாயக்க முதியன்சலாஹே சந்திரகுமார ரத்னாயக்க
பிறந்த திகதி: 1983.07.16
விலாசம்: குமுக்கடவெல, மொரகொல்லாஹம
தேசிய அடையாள அட்டை இல: 831982330V

ஒளிப் பேழை

நன்றி: தமிழீழ தேசிய தொலைக்காட்சி

நத்தார் வாழ்த்துக்கள்

வாசகர்கள் அனைவருக்கும் களத்துமேட்டின் நத்தார் வாழ்த்துக்கள்!

விடுதலைப் புலிகளினால் சிறை பிடிக்கப்பட்ட ஸ்ரீலங்கா படை!

தமிழீழ விடுதலைப் புலிகளின் கட்டுப்பாட்டிலுள்ள வன்னியைக் கைப்பற்றும் நோக்கில் பல இழப்புக்களுக்கும் மத்தியில் முன்னேறி வரும் ஸ்ரீலங்கா படை தரப்பினருக்கு எதிராக விடுதலைப் புலிகள் உக்கிரத் தாக்குதலை மேற்கொண்டதில் கடந்த 2008.12.16 ஆம் திகதி கிளாலியில் 50 பேருக்கும் அதிகமான ஸ்ரீலங்கா இராணுவத்தினர் கொல்லப்பட்டும், 160 பேருக்கும் மேற்பட்டோர் காயமடைந்தும் உள்ளனர், இம் முறியடிப்புச் சமரில் விடுதலைப் புலிகளினால் ஸ்ரீலங்கா இராணுவத்தைச் சேர்ந்த ஒருவர் சிறை பிடிக்கப்பட்டுள்ளார்.

இம்முறியடிப்புத் தாக்குதலில் ஸ்ரீலங்கா படைத்தரப்பின் அநுராதபுரம் கல்நாவ பகுதியைச் சேர்ந்த 53 ஆம் கொமாண்டோ அணியின் 6 ஆம் சிங்கப் படைப் பிரிவின் 22 வயதுடைய திரு.நிஸாந்த றணசிங்க என்பவர் உயிருடன் விடுதலைப் புலிகளால் பிடிக்கப்பட்டுள்ளார்.

நிஸாந்த ரணசிங்க ஊடகவியலாளருக்கு அளித்த செவ்வியின் ஒளிப் பேழை

நன்றி: சங்கதி

ஸ்ரீலங்கா இராணுவத்திடம் சின்னப்பரந்தன்!

கிளிநொச்சியைக் கைப்பற்றும் நோக்கில் முன்னேறி வரும் ஸ்ரீலங்கா படை தரப்பு பரந்தனில் இருந்து 6 கி.மீ. தொலைவில் உள்ள சின்னப்பரந்தன் பகுதி முழுவதையும் 2008.12.23 ஆம் திகதி இன்று தமது கட்டுப்பாட்டின் கீழ் கொணர்ந்துள்ளதாக ஸ்ரீலங்கா இராணுவப் பேச்சாளர் பிரிகேடியர் உதய நாணயக்கார தெரிவித்துள்ளார்.

தமிழீழ விடுதலைப் புலிகளின் பலத்த எதிர்ப்புக்கு மத்தியில் 300 மீற்றர் நீளமான மண்ணரண்களைத் தாண்டி ஏ-35 பாதையில் அமைந்துள்ள சின்னப்பரந்தனைக் கைப்பற்றியதாகவும், இச் சமரில் 12 விடுதலைப்புலிகள் கொல்லப்பபட்டும், பலர் காயமடைந்தும் உள்ளதாக இராணுவப் பேச்சாளர் மேலும் தெரிவித்துள்ளார்.
">

இந்தியாவுக்கு அகதியாகச் சென்ற சிங்களத் தம்பதியர்!

இலங்கைத் தமிழர்களுடன் இணைந்து சிங்களத் தம்பதியரும் தமிழ்நாட்டுக்கு அகதிகளாகச் செல்லும் போது இந்திய குடிவரவு குடியகல்வு அதிகாரிகளினால் அகதித் தஞ்சம் மறுக்கப்பட்டு கைது செய்யப்பட்டுள்ளார்கள்.

2008.12.20 ஆம் திகதி சனிக்கிழமை படகின் மூலம் தமிழகம் சென்ற 19 தமிழர்களுடன் இளம் சிங்கள காதல் தம்பதிகளான 30 வயதுடைய துஸா சந்தன மற்றும் 18 வயதுடைய சறுகா பில்கானி போன்றோரும் இடம்பெற்று இருந்தனர்.

கொழும்புப் பகுதியில் வாகனச் சாரதி பயிற்சி நிலையம் நாடாத்தி வந்த திரு.துஸா சந்தனவிடம் வாகனப் பயிற்சிக்காகச் சென்ற செல்வி.சறுகா பில்கானி காதல் வயப்பட்ட நிலையில் பெற்றோருக்கு தெரியாமல் இருவரும் வவுனியா பிரதேசத்தில் வசித்து வந்தவர்கள், இந் நிலையில் இவர்களுக்கு உதவி வழங்கிய தமிழர்கள் இந்தியாவுக்கு அகதிகளாகச் சென்ற போது இத் தம்பதியரும் கூடவே சென்றுள்ளார்கள் என்பது குறிப்பிடத்தக்கது.