இனிய சர்வசித்து வருடம்

தமிழ் சிங்கள புதுவருட நல்வாழ்த்துக்கள்.

புது வருடம் பிறந்து விட்டால் சந்தோசம் பெருகும், உற்றார்கள் ஒன்று கூடி வாழ்த்துக்களை பகிர்ந்து கொள்ளும் நேரம் அல்லவா இப் புத்தாண்டு.
ஈழத்திலுள்ள அகதி முகாம்களில் தமிழர்கள் படும் வேதனை இன்றோடு தீர்ந்து புத்தாண்டு புதியதாய் மலர்ந்து நல்வாழ்வு மலர வேண்டும். ஈழத் தமிழர்கள் புத்தாண்டு பிறப்பன்று காலையில் எழுந்து மருத்துநீர் வைத்து நீராடி புத்தாடை அணிந்து பொங்கலிட்டு இறைவனுக்கு படையலிட்டு இன்றைய நாளை வரவேற்பது காலங்காலமாய் நடந்தேறும் நிகழ்ச்சி, ஆனால் இன்று இந்நிகழ்வு எத்தனை தமிழர்களின் வீட்டில் நடக்கும்? கண்ணீரே தமிழர்களின் வீடுகளை நிரப்புகின்றன.

சிறு வயதில் புத்தாண்டுப் பிறப்பென்றால் ஒரு வாரத்துக்கு முன்னமே சந்தோசம் வந்து விடும், பெற்றோர் அழகு பார்த்து வாங்கித் தந்த புத்தாடையை அணிய வேண்டுமல்லவா, முதல் நாள் இரவு நித்திரையே வர மறுக்கும், அதிகாலையில் அப்பாவைத் தட்டி எழுப்பி மருத்துநீர் வைத்து குளிப்போமா என கேட்பேன், நேரத்தைப் பாரும் விடிய இன்னும் நேரம் இருக்கு.... எனும் நினைவு வந்து போகின்றது, பின் நீராடி கோவிலுக்கு குடும்பமாய் அம்மா, அப்பா, அண்ணா, அக்கா, தம்பி மற்றும் தங்கையுடன் போய் வணங்கிவிட்டு வரும் வழியில் உறவினர் வீடுகளுக்கும் போய் வருவது வழக்கம், உறவினர்கள் எங்களுக்கு கைவிசேடம் என பணம் தருவார்கள் இவையெல்லாம் என்னை இப்போது இளம் பராயத்துக்கே அழைத்துச் செல்கின்றது.

உங்களுக்கும் இப்படியான நினைவுகள் வந்து செல்லவில்லையா? நீங்களும் பதிவு செய்யலாமே!