பொலநறுவையில் பிள்ளையான் குழுவுக்கும் ஆசனம் !

ஸ்ரீலங்காவின் ஆளும் ஐக்கிய மக்கள் சுதந்திர முன்னணியுடன் இணைந்து வடமத்திய மாகாணத்தின் பொலநறுவை மாவட்டத்தில் போட்டியிட்ட பிள்ளையான் குழுவின் மங்களம் மாஸ்டர் 5480 வாக்குகள் பெற்று தோல்வியைத் தழுவியுள்ளார்.

தெரிவு வாக்குகளின் அடிப்படையில் கடைசி நிலையில் இருக்கும் தமிழ் மக்கள் விடுதலைப் புலிகளின் மங்களம் மாஸ்டருக்கு போனஸ் ஆசனமொன்றை வழங்குவதென ஆளும் கட்சி தீர்மானித்துள்ளது.

நடந்த தேர்தலில் ஐக்கிய மக்கள் சுதந்திர முன்னணி 20 ஆசனங்களையும், ஐக்கிய தேசியக் கட்சி 12 ஆசனங்களையும் மற்றும் மக்கள் விடுதலை முன்னணி ஒரு ஆசனத்தையும் பெற்று 33 ஆசனங்களைக் கொண்ட வடமத்திய மாகாணசபையில் அதிகப்படியான ஆசனத்தைப் பெற்ற ஐக்கிய மக்கள் சுதந்திர முன்னணிக்கு போனஸாக மேலும் இரண்டு ஆசனங்கள் கிடைத்துள்ளன, இதில் ஒன்றே மங்களம் மாஸ்டருக்கு கிடைக்கவுள்ளதாகும்.

பிள்ளையான் குழுவினரின் அடாவடித்தனம் தொடர்கின்றது

பிள்ளையான் குழுவினருக்கு மகிந்த ராஜபக்ஷ் அரசினால் கிழக்கிலங்கையின் ஆட்சி அதிகாரம் வழங்கப்பட்டதைத் தொடர்ந்து பிள்ளையான் குழுவினரின அடாவடித்தனங்கள் தினம் தினம் அதிகரித்து வருவதனை காணக்கூடியதாக இருக்கின்றது.

மட்டு. ஏறாவூர் மூன்றாம் பிரிவில் கடத்திச் செல்லப்பட்ட முஸ்லிம்கள் ஐவரில் நான்கு பேர் விடுவிக்கப் பட்டனர், ஒருவர் இன்னும் விடுவிக்கப்படவில்லை.

மின்சாரம் துண்டிக்கப்பட்டு இருந்த இரவு வேளையில் ஆயுதங்களுடன் வந்த பிள்ளையான் குழுவினர் மட்டு. கல்லடி அலுவலகத்தில் இவர்களை தடுத்து வைத்து விசாரணை செய்துள்ளனர்.

கொண்டு செல்லப்பட்ட ஐவரில் 42 வயதுடைய ஏறாவூர் கடற்தொழிலாளர் சங்கத் தலைவரான எஸ்.எஸ். ஸமத் இன்னும் விடுவிக்கப்படவில்லை.

பிள்ளையான் குழுவினரின் அடாவடித்தனத்தால் தினமும் இப்பகுதி மக்கள் நொந்து வருவது குறிப்பிடத்தக்கது. இதனை கிழக்கிலங்கை முதலமைச்சர் பிள்ளையானும், அக்கட்சியின் தலைவர் கருணாவும் கவனம் எடுப்பார்களா?