தமிழ் தேசிய கூட்டமைப்பினருக்கு நீதிமன்ற அழைப்பாணை!

2006 ஜூன் 28 ஆம் திகதி ஜேர்மனி நாட்டில் நடந்த பொங்கு தமிழ் நிகழ்வில் கலந்து கொண்ட தமிழ் தேசிய கூட்டமைப்பின் மட்டக்களப்பு மாவட்ட பாராளுமன்ற உறுப்பினர்களான எஸ்.ஜெயானந்தமூர்த்தி, பா.அரியநேத்திரன் மற்றும் யாழ்ப்பாண மாவட்ட பாராளுமன்ற உறுப்பினர் செல்லையா கஜேந்திரன் ஆகிய மூவரும் ஸ்ரீலங்காவின் இறைமைக்கு எதிராகக் கருத்து வெளியிட்டமைக்கு எதிராக ஸ்ரீலங்கா குற்றப் புலனாய்வுப் பிரிவினர் கொடுத்த தகவல்களின் அடிப்படையில் டிசம்பர் 10 ஆம் திகதி நீதிமன்றத்துக்குச் சமூகம் தருமாறு கொழும்பு மாவட்ட நீதிபதி அழைப்பாணை அனுப்பியுள்ளார்.

விடுதலைப் புலிகள் தலைவருக்கு கொழும்பு நீதிமன்றத்தின் அழைப்பாணை !

ஸ்ரீலங்காவின் முன்னாள் வெளியுறவு அமைச்சர் லக்ஷ்மன் கதிர்காமரின் கொலை வழக்குத் தொடர்பாக குற்றம் சாட்டப்பட்டுள்ள தமிழீழ விடுதலைப் புலிகளின் தலைவர் வே.பிரபாகரன், விடுதலைப் புலிகளின் புலனாய்வுத்துறைப் பொறுப்பாளர் பொட்டு அம்மான் எனப்படும் சண்முகலிங்கம் சிவசங்கரன் மற்றும் சாள்ஸ் மாஸ்டர் ஆகியோருக்கு முல்லைத்தீவு பிரதேச செயலர் ஊடாக அழைப்பாணை அனுப்பப்பட்டுள்ளதாகவும் அரச தரப்பு சட்டத்தரணி சுனில் குலரட்ண தெரிவித்தார்.

முன்னர் அனுப்பிய அணைப்பாணை கிடைத்தது பற்றிய தகவல்கள் இல்லாததால் மீண்டும் அழைப்பாணை அனுப்புமாறு மேல் நீதிமன்ற நீதிபதி குமுதினி விக்கிரமசிங்க காவற்துறையினருக்கு உத்தரவிட்டதுடன் விசாரணையை செப்டெம்பர் 18 திகதிக்கு ஒத்தி வைத்துள்ளார்.